Madridning «Atletiko» klubi bosh murabbiyi Diyego Simeone Chempionlar ligasi yarim finali doirasida «Arsenal»ga qarshi bo‘lib o‘tadigan javob uchrashuvi oldidan o‘z fikrlari bilan o‘rtoqlashdi. Ispaniya poytaxtida o‘tgan dastlabki bahsda 1:1 hisobidagi durang qayd etilgan edi.
«Biz o‘yin talablarini to‘g‘ri anglagan holda va futbolchilarimiz o‘zlarining eng yuqori darajasini ko‘rsatishlari uchun kerak bo‘lgan uslubda o‘ynashga harakat qilamiz. Nimani xohlayotganimizga ishonchimiz komil. Biroq hamma narsa ham bizga bog‘liq bo‘lmaydi», — deya argentinalik mutaxassisning so‘zlaridan iqtibos keltiradi UYEFA matbuot xizmati.
Simeonening qo‘shimcha qilishicha, «Atletiko»ning o‘yin uchun aniq rejasi bor va jamoa uni maydonda amalga oshirishga intiladi. «Arsenal» — «Atletiko» uchrashuvi 5 may kuni Londondagi «Emireyts» stadionida bo‘lib o‘tadi. Uchrashuv Toshkent vaqti bilan soat 00:00 da boshlanadi.
