Dushanba kuni Italiya A Seriyasida 35-turga ikkita o‘yin bilan yakun yasaldi. Paolo Vanoli boshqaruvidagi «Fiorentina» «Roma»ga yirik hisobda imkoniyatni boy berdi (0:4).
Mutaxassisning fikricha, uning shogirdlari birinchi goldan so‘ng o‘yinni tashlab yuborishgan — bunga balki bevosita raqobatchi «Kremoneze»ning mag‘lubiyatidan xabar topganlari sabab bo‘lgan bo‘lishi mumkin.
«Birinchi o‘tkazib yuborilgan goldan so‘ng futbolchilar to‘xtab qolishdi. «Kremoneze»ning natijasi esa bizga oqlov bo‘la olmaydi. Shuningdek, ajoyib o‘yin namoyish etgan «Roma»ni ham maqtash kerak», — deya Vanolining so‘zlaridan iqtibos keltirmoqda forzaroma.info.
Hozirda «Fiorentina» A Seriya turnir jadvalida 16-o‘rinni egallab turibdi.













