Kataloniyaning «Barselona» klubi «Bornmut»ning 19 yoshli hujumchisi Eli Krupini o‘z safiga qo‘shib olmoqchi. Mundo Deportivo nashrining xabariga ko‘ra, klub shu yozdayoq La Ligaga ko‘chib o‘tishi mumkin bo‘lgan futbolchi uchun kurashishga tayyor. «Barselona» skautlari Krupini hali «Loryan»da o‘ynab yurgan vaqtlaridanoq kuzatib kelishgan va uning o‘yinidan ijobiy taassurot olishgan.
Biroq, yosh fransuz uchun kurashda «Barselona» jiddiy raqobatga duch keladi. Krupiga shuningdek «Arsenal», «Liverpul», «Chelsi» va «Manchester Yunayted» kabi klublar ham da’vogarlik qilmoqda.
Joriy mavsumda hujumchi «Bornmut» safida 32 ta uchrashuvda maydonga tushib, 12 ta gol urishga muvaffaq bo‘ldi. Transfermarkt ma’lumotlariga ko‘ra, uning bozor qiymati 40 million yevroni tashkil etadi. Futbolchining ingliz klubi bilan amaldagi shartnomasi 2030 yilgacha mo‘ljallangan.
