«Barselona» bosh murabbiyi Xans-Diter Flik Madridning «Real» klubiga qarshi bo‘lib o‘tadigan bahs uchun tarkib tanlamoqda. Kataloniyaliklar uchun o‘z uyidagi «el-klasiko» yakshanba, 10 may kuni bo‘lib o‘tadi.

Diario Sport nashrining xabariga ko‘ra, yarim himoyachi Frenki de Yong jarohatidan to‘liq forig‘ bo‘lgan va eng yaxshi sport formasiga kirib olgan, biroq «qaymoqranglilar»ga qarshi o‘yinni zaxira o‘rindig‘ida boshlaydigan ko‘rinadi. Flik taktik sabablarga ko‘ra asosiy tarkibda Gavini tushirishni afzal ko‘rmoqda.

Yakshanba kungi bahs Toshkent vaqti bilan soat 00:00 da (11 mayga o‘tar kechasi) boshlanishi rejalashtirilgan. Agar «ko‘k-anorranglilar» «Kamp Nou»da madridliklarga yutqazib qo‘yishmasa, muddatidan oldin chempionlikni qo‘lga kiritishadi. Hozirda «Barsa» mavsum yakunlanishiga to‘rt tur qolganda «Real»ni 11 ochkoga ortda qoldirmoqda.