«Brentford» jamoasi 24 yoshli braziliyalik hujumchi Igor Tyagoni qancha mablag‘ evaziga qo‘yib yuborishga tayyor ekanligi ma’lum bo‘ldi.

ESPN Brasil bergan ma’lumotlarga ko‘ra, Tyagoning xizmatlariga «Chelsi» klubi qiziqish bildirmoqda. Tarqalgan mish-mishlarga ko‘ra, «asalarilar» «ko‘klar»ga o‘z hujumchisi uchun 93 million yevro olmoqchi ekanliklarini ma’lum qilishgan. Qayd etilishicha, «Brentford» rahbariyati narxni tushirish yoki qandaydir yon berishlar qilish niyatida emas.

Joriy mavsumda Tyago barcha musobaqalarda 37 ta o‘yinda maydonga tushib, 25 ta gol urdi va bitta golli uzatmaga mualliflik qildi. Hujumchining «Brentford» bilan shartnomasi 2031 yilning yoziga qadar mo‘ljallangan. Transfermarkt mutaxassislari o‘yinchining bozor qiymatini 50 million yevroga baholamoqdalar.

Ma’lumot uchun, «Brentford»ning navbatdagi uchrashuvi 9 may kuni soat 19:30 da «Manchester Siti»ga qarshi bo‘lib o‘tadi.