«Брентфорд» жамоаси 24 ёшли бразилиялик ҳужумчи Игорь Тьягони қанча маблағ эвазига қўйиб юборишга тайёр эканлиги маълум бўлди.

ESPN Brasil берган маълумотларга кўра, Тьягонинг хизматларига «Челси» клуби қизиқиш билдирмоқда. Тарқалган миш-мишларга кўра, «асаларилар» «кўклар»га ўз ҳужумчиси учун 93 миллион евро олмоқчи эканликларини маълум қилишган. Қайд этилишича, «Брентфорд» раҳбарияти нархни тушириш ёки қандайдир ён беришлар қилиш ниятида эмас.

Жорий мавсумда Тьяго барча мусобақаларда 37 та ўйинда майдонга тушиб, 25 та гол урди ва битта голли узатмага муаллифлик қилди. Ҳужумчининг «Брентфорд» билан шартномаси 2031 йилнинг ёзига қадар мўлжалланган. Transfermarkt мутахассислари ўйинчининг бозор қийматини 50 миллион еврога баҳоламоқдалар.

Маълумот учун, «Брентфорд»нинг навбатдаги учрашуви 9 май куни соат 19:30 да «Манчестер Сити»га қарши бўлиб ўтади.