Madridning «Real» klubi markaziy himoyachisi David Alaba jamoani tark etishga hozirlik ko‘rmoqda. Avstriyalik futbolchi mavsum yakunida «qaymoqranglilar» safini erkin agent sifatida tark etadi va hozirda uning faoliyatini davom ettirishi uchun turli variantlar ko‘rib chiqilmoqda.
Insayder Nikolo Skiraning xabar berishicha, vositachilar orqali 33 yoshli futbolchining xizmatlari «Yuventus»ga taklif qilingan. Hozircha «keksa sinyora» uchun tajribali markaziy himoyachi nomzodi qay darajada qiziq ekanligi noma’lum. Avvalroq David Alabaning «Milan»ga o‘tishi mumkinligi haqida xabarlar tarqalgan edi.
Joriy mavsumda futbolchi Madrid grandi safida barcha turnirlarda atigi 14 ta o‘yinda maydonga tushdi. Madridga ko‘chib o‘tishdan oldin u «Bavariya» sharafini himoya qilgan va ushbu klub tarkibida o‘n karra Bundesliga g‘olibiga aylangan.
