Мадриднинг «Реал» клуби марказий ҳимоячиси Давид Алаба жамоани тарк этишга ҳозирлик кўрмоқда. Австриялик футболчи мавсум якунида «қаймоқранглилар» сафини эркин агент сифатида тарк этади ва ҳозирда унинг фаолиятини давом эттириши учун турли вариантлар кўриб чиқилмоқда.
Инсайдер Николо Скиранинг хабар беришича, воситачилар орқали 33 ёшли футболчининг хизматлари «Ювентус»га таклиф қилинган. Ҳозирча «кекса синьора» учун тажрибали марказий ҳимоячи номзоди қай даражада қизиқ эканлиги номаълум. Аввалроқ Давид Алабанинг «Милан»га ўтиши мумкинлиги ҳақида хабарлар тарқалган эди.
Жорий мавсумда футболчи Мадрид гранди сафида барча турнирларда атиги 14 та ўйинда майдонга тушди. Мадридга кўчиб ўтишдан олдин у «Бавария» шарафини ҳимоя қилган ва ушбу клуб таркибида ўн карра Бундеслига ғолибига айланган.
