«Pari Sen-Jermen» so‘nggi olti yil ichida uchinchi bor Chempionlar ligasi finalida o‘ynaydigan bo‘ldi. Luis Enrike shogirdlari yarim final qarama-qarshiligida «Bavariya» ustidan umumiy 6:5 hisobida zafar quchishdi.

Opta ma’lumotlariga ko‘ra, «PSJ» 2020 yildan buyon eng nufuzli yevrokubokning final bosqichiga uch marta yetib kelgan yagona jamoadir. Madridning «Real», «Manchester Siti» va Milanning «Inter» klublari ushbu davr mobaynida ikki martadan finalda o‘ynashgan bo‘lsa, boshqa barcha jamoalar hal qiluvchi bahsda ko‘pi bilan bir marta ishtirok etishgan.

Eslatib o‘tamiz, 2020 yilda parijliklar «Bavariya»ga imkoniyatni boy berishgandi (0:1), 2025 yilda esa «Inter»ni tor-mor etib (5:0), ilk bor turnir g‘olibiga aylanishgan edi. Bu gal finalda ularga «Arsenal» raqiblik qiladi.