Fransiyaning «PSJ» klubi Myunxenda «Bavariya» bilan 1:1 hisobida durang o‘ynab, ikki uchrashuv natijasiga ko‘ra 6:5 hisobida g‘alaba qozondi va Chempionlar ligasi 2025/2026 yilgi mavsumi finaliga yo‘l oldi. Fransiyalik hujumchi Usmon Dembelening ushbu o‘yindagi goli parijliklarni bir mavsumdagi eng ko‘p gol urish bo‘yicha musobaqa rekordiga juda yaqinlashtirdi.

UEFA rasmiy sayti ma’lumotiga ko‘ra, Luis Enrike boshchiligidagi jamoa joriy mavsumda Chempionlar ligasining 16 ta uchrashuvida 44 ta gol urdi. Bu musobaqa tarixida bir mavsum doirasidagi ikkinchi eng yaxshi natija hisoblanadi. Eng yaxshi ko‘rsatkich esa 1999/2000 yilgi mavsumda «Barselona» tomonidan qayd etilgan — 45 ta gol. O‘shanda kataloniyaliklarga ham buning uchun 16 ta o‘yin kerak bo‘lgan edi.

Parijliklar uchun bu klub tarixidagi uchinchi Chempionlar ligasi finali bo‘ladi. Titul uchun bahsda jamoa Londonning «Arsenal» klubiga qarshi maydonga tushadi. Uchrashuv 30 may kuni Vengriyada bo‘lib o‘tadi.