Франциянинг «ПСЖ» клуби Мюнхенда «Бавария» билан 1:1 ҳисобида дуранг ўйнаб, икки учрашув натижасига кўра 6:5 ҳисобида ғалаба қозонди ва Чемпионлар лигаси 2025/2026 йилги мавсуми финалига йўл олди. Франциялик ҳужумчи Усмон Дембеленинг ушбу ўйиндаги голи парижликларни бир мавсумдаги энг кўп гол уриш бўйича мусобақа рекордига жуда яқинлаштирди.

УЕФА расмий сайти маълумотига кўра, Луис Энрике бошчилигидаги жамоа жорий мавсумда Чемпионлар лигасининг 16 та учрашувида 44 та гол урди. Бу мусобақа тарихида бир мавсум доирасидаги иккинчи энг яхши натижа ҳисобланади. Энг яхши кўрсаткич эса 1999/2000 йилги мавсумда «Барселона» томонидан қайд этилган — 45 та гол. Ўшанда каталонияликларга ҳам бунинг учун 16 та ўйин керак бўлган эди.

Парижликлар учун бу клуб тарихидаги учинчи Чемпионлар лигаси финали бўлади. Титул учун баҳсда жамоа Лондоннинг «Арсенал» клубига қарши майдонга тушади. Учрашув 30 май куни Венгрияда бўлиб ўтади.