“Inter” hujumchisi Markus Tyuram aprel oyi yakunlariga ko‘ra Italiya chempionatining eng yaxshi futbolchisi deb topildi. Bu haqda A Seriyaning rasmiy saytida xabar berildi.
O‘tgan oyda Tyuram chempionatda “Inter”ning to‘rtta o‘yinida ishtirok etdi. Ularda fransiyalik futbolchi o‘z hisobiga beshta gol va ikkita golli uzatma yozdirib qo‘ydi.
Markus Tyuram mukofotni “Inter”ning navbatdagi uy uchrashuvi oldidan – 17 may kuni qabul qilib oladi. Bu kuni “neradzurrilar” “Verona”ga qarshi o‘ynaydi.
Eslatib o‘tamiz, may oyi boshida “Inter” “Parma”ni mag‘lub etib, muddatidan avval Italiya chempioni bo‘ldi.
