«Manchester Siti» Angliya chempionati turnir jadvalida ikkinchi o‘rinni egallab turibdi. Xosep Gvardiola jamoasi «Arsenal»dan besh ochko ortda qolmoqda, biroq zaxirasida bitta o‘yin bor. Chempionat yakuniga qadar qolgan to‘rtta o‘yindan uchtasini «shaharliklar» o‘z uyida o‘tkazishadi. Gvardioladan bu omil qanchalik muhimligi haqida so‘rashdi.

«O‘z uyimizda o‘ynashni yaxshi ko‘raman, bu borada boshqa nima ham deyish mumkin. Umid qilamanki, biz «Arsenal»ga bosim o‘tkaza olamiz. O‘z o‘yinlarimizda g‘alaba qozonish — biz qila oladigan yagona ish», — dedi Gvardiola matbuot anjumani chog‘ida.

Mavsum yakuniga qadar «Manchester Siti» «Brentford» (uyda), «Kristal Pelas» (uyda), «Bornmut» (safarda) va «Aston Villa» (uyda) jamoalariga qarshi maydonga tushadi.