«Arsenal» bosh murabbiyi Mikel Arteta jamoasining Chempionlar Ligasi finaliga yo‘llanma olganini haddan tashqari hissiyot bilan nishonlagani uchun aytilgan tanqidlarga javob qaytardi.
Avvalroq «MYU» va Angliya terma jamoasi sobiq hujumchisi Ueyn Runi: «Biroz oshirib yuborishdi. G‘alaba qozonganingizdan keyin bayram qiling!» — deb aytgan edi. «Chelsi»ning sobiq hujumchisi Jimmi Floyd Xasselbaynk ham «kanonirlar»ning xatti-harakatidan norozi bo‘ldi: «Bu haddan tashqari ko‘p. G‘alabadan keyin telbalarcha quvonish mumkin, lekin ular hali hech narsa qilishgani yo‘q».
«Bundan xabarim yo‘q edi, lekin har qanday fikrni hurmat qilish va unga munosib munosabatda bo‘lish kerak. Bu u qadar muhim emas. Menimcha, tanqid ham ijobiy, ham salbiy bo‘lishi mumkin. Bu sizni yaxshiroq qiladi.
Siz yuqori standartlarni o‘rnatishni va Yevropaning ikkita eng nufuzli turnirida kurashish imkonini beradigan darajada bo‘lishni istaysiz. Bunga tayyor bo‘lish kerak, chunki bu haqiqatan ham sizni kuchliroq qiladi — bu aniq», — dedi Arteta.
Eslatib o‘tamiz, Chempionlar Ligasi finalida «Arsenal» «PSJ» jamoasi bilan to‘qnash keladi.
