«Арсенал» бош мураббийи Микель Артета жамоасининг Чемпионлар Лигаси финалига йўлланма олганини ҳаддан ташқари ҳиссиёт билан нишонлагани учун айтилган танқидларга жавоб қайтарди.
Аввалроқ «МЮ» ва Англия терма жамоаси собиқ ҳужумчиси Уэйн Руни: «Бироз ошириб юборишди. Ғалаба қозонганингиздан кейин байрам қилинг!» — деб айтган эди. «Челси»нинг собиқ ҳужумчиси Жимми Флойд Хасселбайнк ҳам «канонирлар»нинг хатти-ҳаракатидан норози бўлди: «Бу ҳаддан ташқари кўп. Ғалабадан кейин телбаларча қувониш мумкин, лекин улар ҳали ҳеч нарса қилишгани йўқ».
«Бундан хабарим йўқ эди, лекин ҳар қандай фикрни ҳурмат қилиш ва унга муносиб муносабатда бўлиш керак. Бу у қадар муҳим эмас. Менимча, танқид ҳам ижобий, ҳам салбий бўлиши мумкин. Бу сизни яхшироқ қилади.
Сиз юқори стандартларни ўрнатишни ва Европанинг иккита энг нуфузли турнирида курашиш имконини берадиган даражада бўлишни истайсиз. Бунга тайёр бўлиш керак, чунки бу ҳақиқатан ҳам сизни кучлироқ қилади — бу аниқ», — деди Артета.
Эслатиб ўтамиз, Чемпионлар Лигаси финалида «Арсенал» «ПСЖ» жамоаси билан тўқнаш келади.
