«Barselona» markaziy himoyachisi Pau Kubarsi jamoaning joriy mavsumdagi ishtirokiga baho berdi. Kataloniyaliklar La Ligada chempionlikni deyarli naqd qilishgan, YECHL va Ispaniya Kubogida esa mos ravishda chorak final va yarim final bosqichida Madridning «Atletiko» jamoasiga imkoniyatni boy berib, musobaqani tark etishgan. Avvalroq «ko‘k-anorranglilar» mamlakat Superkubogida zafar quchishgan edi.

«Yakunda biz yana La Ligada g‘olib bo‘lishga yaqin turibmiz. Menimcha, biz ham bu yil, ham o‘tgan mavsumda Ispaniya ichida katta muvaffaqiyatlarga erishdik. Ha, Chempionlar ligasida bizga yana nimadir yetishmadi, lekin biz tajriba to‘plashda davom etyapmiz va yakunda, albatta, Yevropada ham o‘z maqsadimizga erishamiz. O‘ylashimcha, biz yaxshi mavsum o‘tkazdik va uni o‘n ballik tizimda yetti yoki sakkiz ballga baholash mumkin», – deya 19 yoshli futbolchining so‘zlarini keltiradi Ispaniya OAVlari.

10 may kuni «Barselona» o‘z maydonida Madridning «Real» klubiga yutqazmasa, muddatidan oldin Ispaniya chempioniga aylanadi.