«Chelsi» himoyachisi Mark Kukurelya faoliyatini yana Ispaniya chempionatida davom ettirishi mumkin. Diario AS nashrining xabar berishicha, 27 yoshli futbolchiga Madridning «Atletiko» klubi jiddiy qiziqish bildirmoqda.

Madridliklar ispaniyalik himoyachining transferi uchun London klubiga 50 million yevro miqdorida taklif yuborishga tayyorlanmoqda. Hozircha «Chelsi» rahbariyati o‘z asosiy tarkib o‘yinchilaridan birini qo‘yib yuborishga tayyor yoki tayyor emasligi bo‘yicha yakuniy qarorga kelgani yo‘q.

Ma’lumot uchun, Mark Kukurelya 2022 yilda «Brayton»dan 65 million yevro evaziga «aristokratlar» safiga kelib qo‘shilgan edi. Uning «ko‘klar» bilan amaldagi shartnomasi 2028 yilning yoziga qadar mo‘ljallangan.

Joriy mavsumda himoyachi «Chelsi» libosida barcha musobaqalarda 47 ta o‘yinda ishtirok etib, bitta gol va 4 ta golli uzatmaga mualliflik qildi. Transfermarkt portali futbolchining ayni damdagi bozor qiymatini 50 million yevroga baholagan.