Madridning «Atletiko» klubi hujumchisi Xulian Alvares faoliyatini boshqa jamoada davom ettirishi mumkin. Jurnalist Pedro Fulyananing ma’lumotiga ko‘ra, garchi «matraschilar» argentinalik futbolchi bilan xayrlashishni istamayotgan bo‘lsa-da, o‘yinchining vakillari allaqachon yangi transfer ustida ish boshlashgan.

Hozirda 26 yoshli hujumchi uchun asosiy da’vogar «Barselona» bo‘lib turibdi. Kataloniya klubi bilan dastlabki aloqalar o‘rnatilgani aytilmoqda. Shuningdek, Chempionlar ligasi finalchilari — «Arsenal» va «PSJ» ham futbolchining holatini kuzatib bormoqda. Biroq hozircha birorta klub bilan rasmiy muzokaralar boshlanmagan.

Eslatib o‘tamiz, Xulian Alvaresning Madrid klubi bilan amaldagi shartnomasi 2030 yilgacha mo‘ljallangan. Transfermarkt portali hujumchining transfer qiymatini 90 million yevroga baholagan.