«Barselona» bosh murabbiyi Xans-Diter Flik Ispaniya La Ligasining markaziy bahsi — «Real»ga qarshi «el-klasiko» oldidan o‘z mulohazalarini bildirdi. Agar kataloniyaliklar ushbu bahsda mag‘lub bo‘lishmasa, mavsum yakunini kutmasdan, muddatidan oldin chempionlikni rasmiylashtirishadi.

Murabbiy raqibning hozirgi holati va o‘yinning ahamiyati haqidagi savollarga javob qaytardi.

«Real»ning inqirozda ekanligi o‘yinni osonlashtiradimi?» degan savolga Flik quyidagicha javob berdi: «Biz o‘z uyimizda g‘alaba qozonishga intilamiz. Bizda ajoyib jamoa va bizni qo‘llab-quvvatlaydigan muxlislar bor. «Real» uchun ham bu «el-klasiko» va ular ham g‘alabani xohlashadi — bu tabiiy hol. Bu bahs hamma uchun birdek muhim».

Shuningdek, Flik ushbu uchrashuv uning faoliyatidagi eng muhim o‘yinmi yoki yo‘qligi haqida ham to‘xtalib o‘tdi:

«Bu oddiy o‘yin emas, lekin men uni eng muhimi deb aytmagan bo‘lardim. Biz ketma-ket ikkinchi bor chempionlikni qo‘lga kiritmoqchimiz — bu Ispaniyada har doim ham kuzatiladigan oddiy holat emas».

Eslatib o‘tamiz, «Barselona» va «Real» o‘rtasidagi bahs 10 may, yakshanba kuni bo‘lib o‘tadi. Ushbu o‘yindagi durang ham «ko‘k-anorranglilar»ni chempionga aylantiradi.