«Барселона» бош мураббийи Ханс-Дитер Флик Испания Ла Лигасининг марказий баҳси — «Реал»га қарши «эл-класико» олдидан ўз мулоҳазаларини билдирди. Агар каталонияликлар ушбу баҳсда мағлуб бўлишмаса, мавсум якунини кутмасдан, муддатидан олдин чемпионликни расмийлаштиришади.

Мураббий рақибнинг ҳозирги ҳолати ва ўйиннинг аҳамияти ҳақидаги саволларга жавоб қайтарди.

«Реал»нинг инқирозда эканлиги ўйинни осонлаштирадими?» деган саволга Флик қуйидагича жавоб берди: «Биз ўз уйимизда ғалаба қозонишга интиламиз. Бизда ажойиб жамоа ва бизни қўллаб-қувватлайдиган мухлислар бор. «Реал» учун ҳам бу «эл-класико» ва улар ҳам ғалабани хоҳлашади — бу табиий ҳол. Бу баҳс ҳамма учун бирдек муҳим».

Шунингдек, Флик ушбу учрашув унинг фаолиятидаги энг муҳим ўйинми ёки йўқлиги ҳақида ҳам тўхталиб ўтди:

«Бу оддий ўйин эмас, лекин мен уни энг муҳими деб айтмаган бўлардим. Биз кетма-кет иккинчи бор чемпионликни қўлга киритмоқчимиз — бу Испанияда ҳар доим ҳам кузатиладиган оддий ҳолат эмас».

Эслатиб ўтамиз, «Барселона» ва «Реал» ўртасидаги баҳс 10 май, якшанба куни бўлиб ўтади. Ушбу ўйиндаги дуранг ҳам «кўк-анорранглилар»ни чемпионга айлантиради.