«Bornmut» bosh murabbiyi Andoni Iraola Angliya Premyer-ligasining boshqa bir klubidan taklif oldi. Taniqli insayderning xabar berishicha, «Kristal Pelas» ispaniyalik mutaxassisga 2029 yilgacha mo‘ljallangan shartnoma taklif qilgan.

Taklifga ko‘ra, murabbiyning yillik maoshi taxminan 4,9 million yevroni tashkil etishi mumkin. Qayd etilishicha, Iraola «burgutlar» loyihasiga katta qiziqish bildirmoqda va ushbu variantni jiddiy ravishda ko‘rib chiqmoqda.

Biroq, 43 yoshli mutaxassis yakuniy qaror qabul qilishga shoshilmayapti. Bunga uning xizmatlariga «Chelsi» va «Manchester Yunayted» kabi nufuzliroq klublar tomonidan qiziqish borligi sabab bo‘lmoqda. Iraola vaziyatni kuzatib, mavsum yakunida eng maqbul variantni tanlashni maqsad qilgan.

Ma’lumot uchun, Andoni Iraola 2023 yildan buyon «Bornmut»ni boshqarib kelmoqda. Uning qo‘l ostida jamoa joriy mavsumda ajoyib natijalar qayd etmoqda — «olchalar» 35 turdan so‘ng 52 ochko bilan APL turnir jadvalida 6-o‘rinni egallab turibdi.