O‘zbekiston kubogi 1-turi doirasidagi «Dinamo» - «G‘azalkent» (2:3) uchrashuvidan keyin «Dinamo» murabbiyi Marat Miftaxutdinov matbuot anjumanida ishtirok etdi.
- O‘yin haqida gapiradigan bo‘lsam, avvalo «G‘azalkent»ni g‘alaba bilan tabriklayman. Nima deyishim mumkin? Ular himoyaga urg‘u berib o‘ynashdi va qarshi hujumdagi vaziyatlarini golga aylantirishdi. Ularda hammasi o‘xshadi.
Aftidan, biz o‘yinga to‘g‘ri yondasha olmagandekmiz. O‘yin davomida esa buni to‘g‘rilay olmadik. O‘yin uslubimizdan kelib chiqqan holda maydon holati, yomg‘irni bahona qilmoqchi emasman. Lekin himoyalana olmadik va qarshi hujumlarda jazolandik.
- Bunday ob-havo va maydondagi holatdan kelib chiqqan holda «Dinamo» o‘yinchilarini mag‘lubiyat uchun ayblash noo‘rindir, ammo raqib Pro ligadagi yosh bolalar edi...
- Hammasini tushunib turibman. Birinchidan ular yaxshi shakllangan jamoa, yosh o‘yinchilar maydonda juda katta ishtiyoq bilan to‘p surishdi. Ularning ishtiyoqi bilan bizdagi ishtiyoqni taqqoslasak, farq sezildi. Bu ham mag‘lubiyatga sabablardan biri bo‘ldi. O‘zingiz vaziyatni bilasiz, balki shu ham natijaga ta’sir qilgandir. Tushunarsiz vaziyat, - dedi Marat Miftaxutdinov kubok o‘yinidan keyin.
