«Manchester Siti» markaziy himoyachisi Ruben Diash Milanning «Inter» klubiga o‘tmaydi. Bu haqda insayder Fabrisio Romano ma’lum qildi.

Diashni «Inter» bilan bog‘layotgan mish-mishlarga qaramay, bu transferning amalga oshish ehtimoli juda past. Ta’kidlanishicha, portugaliyalik futbolchi «shaharliklar» kiyinish xonasidagi asosiy figuralardan biri hisoblanadi.

Diash 2020 yildan beri «Manchester Siti» sharafini himoya qilib kelmoqda. Joriy mavsumda 28 yoshli himoyachi barcha turnirlarni inobatga olgan holda 32 ta o‘yinda maydonga tushdi va ikkita gol muallifiga aylandi. Diashning ingliz grandi bilan amaldagi shartnomasi 2029 yilgacha mo‘ljallangan. Transfermarkt ekspertlari futbolchining qiymatini 60 million yevroga baholashmoqda.