Turinning «Yuventus» klubi hujumchisi Dushan Vlaxovich faoliyatini Italiyaning boshqa grand jamoasida davom ettirishi mumkin. Bu haqda Corriere dello Sport nashri xabar bermoqda.
Manbaning ta’kidlashicha, serbiyalik hujumchiga «Milan» jiddiy qiziqish bildirmoqda. «Rossonerilar» rahbariyati 26 yoshli futbolchining transferi bo‘yicha taklif tayyorlamoqda. Ma’lumotlarga ko‘ra, ushbu kelishuv Massimiliano Allegri turinliklar boshqaruvida qolgan taqdirda amalga oshishi ehtimoli yuqori.
Qayd etilishicha, Dushan Vlaxovichning «keksa sinyora» bilan amaldagi shartnomasi shu yilning iyun oyi oxirida yakuniga yetadi. Shu sababli, milanliklar futbolchini erkin agent sifatida bepul qo‘lga kiritishlari mumkin.
Joriy mavsumda Vlaxovich A Seriya doirasida 17 ta uchrashuvda maydonga tushib, o‘z hisobiga 5 ta gol va bitta golli uzatmani yozib qo‘ydi.
