«Inter» klubi sobiq himoyachisi Marko Materassi Alessandro Bastonining jamoadagi kelajagi va «Barselona»ning unga bo‘lgan qiziqishi haqida o‘z fikrlarini bildirdi.
So‘nggi xabarlarga ko‘ra, 27 yoshli italiyalik markaziy himoyachi «ko‘k-anorranglilar» safiga o‘tish istagida. Biroq Materassi tajribali futbolchiga Milanda qolishni maslahat bermoqda.
«Bastonining mahorati va jamoa uchun qiymati muhokama qilinmaydi. Garchi bu yil u uchun biroz murakkab kechayotgan bo‘lsa-da, hamma uning haqiqiy «interist» ekanini biladi. Men unga «Inter»da qolishni maslahat beraman», — deya iqtibos keltiradi jurnalist Nikolo Skira Materassining so‘zlaridan.
Ma’lumot o‘rnida, Transfermarkt portali Alessandro Bastonining transfer narxini 70 million yevroga baholagan. Futbolchining Milan grandi bilan amaldagi shartnomasi 2028 yilga qadar mo‘ljallangan.
