«Интер» клуби собиқ ҳимоячиси Марко Матерацци Алессандро Бастонининг жамоадаги келажаги ва «Барселона»нинг унга бўлган қизиқиши ҳақида ўз фикрларини билдирди.

Сўнгги хабарларга кўра, 27 ёшли италиялик марказий ҳимоячи «кўк-анорранглилар» сафига ўтиш истагида. Бироқ Матерацци тажрибали футболчига Миланда қолишни маслаҳат бермоқда.

«Бастонининг маҳорати ва жамоа учун қиймати муҳокама қилинмайди. Гарчи бу йил у учун бироз мураккаб кечаётган бўлса-да, ҳамма унинг ҳақиқий «интерист» эканини билади. Мен унга «Интер»да қолишни маслаҳат бераман», — дея иқтибос келтиради журналист Николо Скира Матераццининг сўзларидан.

Маълумот ўрнида, Transfermarkt портали Алессандро Бастонининг трансфер нархини 70 миллион еврога баҳолаган. Футболчининг Милан гранди билан амалдаги шартномаси 2028 йилга қадар мўлжалланган.