«Real» prezidenti Florentino Peres Madridning boshqa bir jamoasi — «Atletiko» atrofidagi vaziyatga munosabat bildirib, klubning yangi egalarini keskin tanqid qildi.
«Men va’da berganimdek, klub aktivlarini uning a’zolariga topshirishni istayman. Klub ularga tegishli. Men «Atletiko»ni boshqarib, keyin uni sotib yuborib, boylik orttirganlar kabi emasman. Men uchun ultras guruhlari emas, klub a’zolari ovoz berishadi», — dedi Peres.
«Real» prezidenti o‘z nutqida joriy yil boshida «Atletiko»ning nazorat paketini (57%) sotib olgan Amerikaning «Apollo» fondini nazarda tutgan. Ma’lumot uchun, ushbu kelishuvdan so‘ng «matraschilar» klubining umumiy qiymati taxminan 2,5 milliard yevroga baholanmoqda.
