«Реал» президенти Флорентино Перес Мадриднинг бошқа бир жамоаси — «Атлетико» атрофидаги вазиятга муносабат билдириб, клубнинг янги эгаларини кескин танқид қилди.

«Мен ваъда берганимдек, клуб активларини унинг аъзоларига топширишни истайман. Клуб уларга тегишли. Мен «Атлетико»ни бошқариб, кейин уни сотиб юбориб, бойлик орттирганлар каби эмасман. Мен учун ультрас гуруҳлари эмас, клуб аъзолари овоз беришади», — деди Перес.

«Реал» президенти ўз нутқида жорий йил бошида «Атлетико»нинг назорат пакетини (57%) сотиб олган Американинг «Apollo» фондини назарда тутган. Маълумот учун, ушбу келишувдан сўнг «матрасчилар» клубининг умумий қиймати тахминан 2,5 миллиард еврога баҳоланмоқда.