«Manchester Siti»ning ispaniyalik yarim himoyachisi Rodri Ernandes yaqin vaqt ichida klub bilan yangi mehnat shartnomasini imzolashi mumkin. Bu haqda taniqli jurnalist Matteo Moretto xabar bermoqda.

Manba bergan ma’lumotlarga ko‘ra, Rodriga jiddiy qiziqish bildirayotgan Madridning «Real» klubi futbolchini sotib olish bo‘yicha hali hech qanday rasmiy qadam tashlagani yo‘q. Hozirgi vaqtda «Oltin to‘p» sohibi «Real»ga o‘tishdan ko‘ra, «Manchester Siti» bilan kelishuvni uzaytirishga yaqinroq turibdi. Yakuniy qaror yaqin kunlarda qabul qilinishi kutilmoqda.

Ta’kidlanishicha, «shaharliklar» bir necha haftadan beri Rodri bilan yangi shartnoma bo‘yicha muzokaralar olib bormoqda va endilikda bu jarayonni tezlashtirish niyatida.

29 yoshli futbolchi joriy mavsumda barcha turnirlarda 31 ta o‘yinda maydonga tushib, 2 ta gol urishga muvaffaq bo‘ldi. Bugun soat 00:00 da uning jamoasi «Kristal Pelas»ga qarshi bahs olib boradi.