El Chiringuito ko‘rsatuvida jurnalistlarning aeroportda «Benfika» bosh murabbiyi Joze Mourinyoga "hujum" qilgani aks etgan video namoyish etildi.
Portugaliyalik mutaxassisga kutilganidek, uning Madridning «Real» klubiga qaytishi haqidagi mish-mishlar fonida kelajagi borasida ko‘plab savollar berildi. Xususan, Florentino Peresning so‘nggi bayonotlari va «Benfika» rahbariyati bilan olib borilayotgan muzokaralar haqida so‘raldi.
Mourinyo esa savollarni jimgina tinglab, yo‘lida davom etdi. Shu payt jurnalistlardan biri murabbiyning rahmini keltirishga urinib, uni aeroportda tungi soat 03:00 dan beri kutayotganini aytdi. Joze esa bunga javoban qisqagina qilib: «Nima ham derdim, siz adashibsiz», deya javob qaytardi.
Ma’lumot uchun, La Liga yakunlanishiga uch tur qolganda «Real» turnir jadvalida ikkinchi o‘rinda bormoqda.
