El Chiringuito кўрсатувида журналистларнинг аэропортда «Бенфика» бош мураббийи Жозе Моуриньога "ҳужум" қилгани акс этган видео намойиш этилди.
Португалиялик мутахассисга кутилганидек, унинг Мадриднинг «Реал» клубига қайтиши ҳақидаги миш-мишлар фонида келажаги борасида кўплаб саволлар берилди. Хусусан, Флорентино Переснинг сўнгги баёнотлари ва «Бенфика» раҳбарияти билан олиб борилаётган музокаралар ҳақида сўралди.
Моуриньо эса саволларни жимгина тинглаб, йўлида давом этди. Шу пайт журналистлардан бири мураббийнинг раҳмини келтиришга уриниб, уни аэропортда тунги соат 03:00 дан бери кутаётганини айтди. Жозе эса бунга жавобан қисқагина қилиб: «Нима ҳам дердим, сиз адашибсиз», дея жавоб қайтарди.
Маълумот учун, Ла Лига якунланишига уч тур қолганда «Реал» турнир жадвалида иккинчи ўринда бормоқда.
