Madridning «Real» klubi muxlislari Alvaro Arbeloaning kelgusi mavsumda ham jamoa boshqaruvida qolishini istashmoqda.

Teledeporte nashrining xabar berishicha, bugun ispaniyalik mutaxassis o‘z avtomobilida «qaymoqranglilar» mashg‘ulot bazasini tark etayotgan vaqtda bir guruh muxlislar uni to‘xtatishgan. Ishqibozlar murabbiyga qarata: «Madrid seni sevadi!» va «Arbeloa, qol!» deya hayqirishgan. Mutaxassis esa muxlislarning bu chorlovlariga tabassum bilan javob qaytargan.

Eslatib o‘tamiz, Alvaro Arbeloa joriy yilning yanvar oyida Xabi Alonso o‘rnini egallab, «Real» bosh murabbiyiga aylangan edi.

Madrid klubi La Liganing 35-turida «Barselona»dan mag‘lub bo‘lgach, Ispaniya chempionligi uchun imkoniyatlarni rasman boy berdi.