«Manchester Siti» bosh murabbiyi Xosep Gvardiola jamoa yarim himoyachilari Fil Foden va Bernardu Silvani o‘zaro solishtirdi. Angliyalik futbolchi mavsum yakunida klubni erkin agent sifatida tark etadigan portugaliyalikning vorisi sifatida ko‘rilmoqda.

Gvardiolaning fikricha, ikki futbolchi maydonda turlicha vazifalarni bajaradi.

«Ular juda farqli o‘yinchilar. Fil raqib jarima maydonchasi atrofida xavfliroq, Bernardu esa o‘yinni global ma’noda yaxshiroq o‘qiydi», – deya mutaxassisning so‘zlarini keltiradi The Touchline.

Ma’lumot uchun, chorshanba kuni «shaharliklar» Premyer-liga doirasida «Kristal Pelas»ni 3:0 hisobida mag‘lub etishdi. Ushbu bahsda Fil Foden ikkita golli uzatmani amalga oshirib, jamoasi g‘alabasiga munosib hissa qo‘shdi.

Eslatib o‘tamiz, Bernardu Silva joriy mavsum yakunlangach, «Manchester Siti» bilan xayrlashishi kutilmoqda.