«Манчестер Сити» бош мураббийи Хосеп Гвардиола жамоа ярим ҳимоячилари Фил Фоден ва Бернарду Силвани ўзаро солиштирди. Англиялик футболчи мавсум якунида клубни эркин агент сифатида тарк этадиган португалияликнинг вориси сифатида кўрилмоқда.

Гвардиоланинг фикрича, икки футболчи майдонда турлича вазифаларни бажаради.

«Улар жуда фарқли ўйинчилар. Фил рақиб жарима майдончаси атрофида хавфлироқ, Бернарду эса ўйинни глобал маънода яхшироқ ўқийди», – дея мутахассиснинг сўзларини келтиради The Touchline.

Маълумот учун, чоршанба куни «шаҳарликлар» Премьер-лига доирасида «Кристал Пэлас»ни 3:0 ҳисобида мағлуб этишди. Ушбу баҳсда Фил Фоден иккита голли узатмани амалга ошириб, жамоаси ғалабасига муносиб ҳисса қўшди.

Эслатиб ўтамиз, Бернарду Силва жорий мавсум якунлангач, «Манчестер Сити» билан хайрлашиши кутилмоқда.