«Barselona» bosh murabbiyi Xans-Diter Flik La Liganing navbatdagi turida «Alaves»dan uchralgan mag‘lubiyatdan (0:1) so‘ng o‘z fikrlari bilan o‘rtoqlashdi. Birinchi bo‘lim yakunida o‘tkazib yuborilgan yagona golga kataloniyaliklar bahs yakuniga qadar javob qaytara olishmadi.

Ushbu g‘alaba «Alaves»ga xavfli hududni tark etish imkonini berdi. «Ko‘k-anorranglilar» uchun esa bu mag‘lubiyat turnir jadvaliga ta’sir qilmaydi — jamoa o‘tgan turdayoq chempionlikni naqd qilgan edi.

«Biz o‘yinni nazorat qilishga harakat qildik, lekin menimcha, hujumda odatdagidek yaxshi o‘ynay olmadik. Raqib darvozasi oldida juda kam xavfli vaziyatlar yaratdik», — deya Flikning so‘zlarini keltiradi Barca Universal.

Ma’lumot uchun, La Liga yakunlanishiga ikki tur qolganda «Barselona» eng yaqin ta’qibchisi Madridning «Real» klubini 14 ochkoga ortda qoldirmoqda.