Angliya Premyer-ligasining navbatdagi turida «Manchester Siti» o‘z maydonida «Kristal Pelas»ni yirik 3:0 hisobida mag‘lub etdi. Ushbu g‘alabadan so‘ng «shaharliklar» peshqadam «Arsenal» bilan oradagi farqni 2 ochkogacha qisqartirishdi.
Shunga qaramay, chempionlik taqdiri hamon «kanonirlar» qo‘lida: London klubi qolgan ikki o‘yinda g‘alaba qozonsa, 22 yillik tanaffusdan so‘ng ilk bor chempionlikni qo‘lga kiritadi.
«Manchester Siti» yarim himoyachisi Fil Foden jamoasining imkoniyatlarini yuqori baholamoqda.
«Biz «Arsenal»ga bosim o‘tkazishda davom etishimiz, ularni hayajonda ushlab turishimiz kerak. So‘nggi turda har qanday voqea sodir bo‘lishi mumkin. Men buni ko‘p marta boshdan kechirganman: ba’zan hammasi omadsiz tugayotgandek tuyuladi, lekin yakunda g‘alaba qozonamiz. Xullas, biz o‘z ishimizni qilishda davom etishimiz shart», – dedi Foden Sky Sports nashriga bergan intervyusida.
Ma’lumot uchun, APLning so‘nggi ikki turida «Siti» «Bornmut» va «Aston Villa»ga qarshi maydonga tushadi. Ungacha esa Xosep Gvardiola shogirdlari Angliya Kubogi finalida «Chelsi» bilan kuch sinashadi.
