Fransiya terma jamoasi bosh murabbiyi Didye Desham JCH-2026 dan so‘ng faoliyatini Italiya milliy jamoasida davom ettirishi mumkinligi borasidagi mish-mishlarga munosabat bildirdi. Tajribali mutaxassis joriy yilgi Jahon chempionati yakunlanganidan keyin o‘z lavozimini tark etishi kutilmoqda.
«Yaqin orada men erkin agentga aylanaman, bundan hammaning xabari bor. Italiya? Hech qaysi variantni istisno qilmayman. Ammo hozircha bu mening rejalarimga kirmaydi. Voqealar rivojini kuzatish kerak», — deya Deshamning so‘zlarini keltirmoqda RMC Sport.
Eslatib o‘tamiz, Didye Desham 2012 yildan buyon Fransiya terma jamoasini boshqarib keladi va 2018 yilgi mundialda jamoani jahon chempionligiga yetaklagan.
O‘z navbatida, ketma-ket uchinchi marotaba Jahon chempionati yo‘llanmasidan quruq qolgan Italiya terma jamoasida ayni damda bosh murabbiylik kursisi bo‘sh turibdi. Saralashdagi muvaffaqiyatsizlikdan so‘ng Djennaro Gattuzo «Skuadra Adzurra» boshqaruvini tark etgan edi.













