Niderlandiya terma jamoasi va «Manchester Yunayted» klubi sobiq darvozaboni Edvin van der Sar «Liverpul» posboni Alisson Bekerning Turinning «Yuventus» klubiga o‘tishi mumkinligi haqidagi xabarlarga o‘z munosabatini bildirdi.

«Beker dunyoning eng yaxshi darvozabonlaridan biri hisoblanadi. U yuqori saviyadagi futbolchi. Men uning «Liverpul»dagi o‘yinlariga hamisha qoyil qolganman. «Yuventus» uchun Alisson juda ishonchli variant bo‘la oladi. Unda Italiyada to‘p surish tajribasi bor, bu esa unga moslashib ketishda yordam beradi», – deya sobiq golkiperning so‘zlarini keltiradi Gazzetta dello Sport nashri.

Alisson 2018 yilning yozidan buyon Liverpul shahri jamoasi sharafini himoya qilib kelmoqda. Tomonlar o‘rtasidagi amaldagi shartnoma 2027 yilning iyun oyi yakunida nihoyasiga yetadi, uning transfer bozoridagi narxi esa 17 million yevroga baholanmoqda.