Нидерландия терма жамоаси ва «Манчестер Юнайтед» клуби собиқ дарвозабони Эдвин ван дер Сар «Ливерпуль» посбони Алиссон Бекернинг Туриннинг «Ювентус» клубига ўтиши мумкинлиги ҳақидаги хабарларга ўз муносабатини билдирди.
«Бекер дунёнинг энг яхши дарвозабонларидан бири ҳисобланади. У юқори савиядаги футболчи. Мен унинг «Ливерпуль»даги ўйинларига ҳамиша қойил қолганман. «Ювентус» учун Алиссон жуда ишончли вариант бўла олади. Унда Италияда тўп суриш тажрибаси бор, бу эса унга мослашиб кетишда ёрдам беради», – дея собиқ голкипернинг сўзларини келтиради Gazzetta dello Sport нашри.
Алиссон 2018 йилнинг ёзидан буён Ливерпуль шаҳри жамоаси шарафини ҳимоя қилиб келмоқда. Томонлар ўртасидаги амалдаги шартнома 2027 йилнинг июнь ойи якунида ниҳоясига етади, унинг трансфер бозоридаги нархи эса 17 миллион еврога баҳоланмоқда.
