«Manchester Siti» bosh murabbiyi Xosep Gvardiola «Manchester Yunayted» futbolchisi Lyuk Shouni alohida e’tirof etdi. Shanba kuni «Uembli» stadionida Angliya Kubogi finali bo‘lib o‘tadi va unda «shaharliklar» «Chelsi»ga qarshi bahs olib borishadi.
O‘yin oldidan tashkil etilgan matbuot anjumanida ispaniyalik mutaxassis «Siti»ning yaqinda Angliya yoshlar Kubogi finalida «Manchester Yunayted» ustidan qozongan g‘alabasi haqidagi savolga javob berar ekan, «qizil iblislar»ning chap qanot himoyachisini o‘zining eng sevimli futbolchilaridan biri deb atadi.
«Manchester Siti» va «Chelsi» o‘rtasidagi bugungi uchrashuv Toshkent vaqti bilan soat 19:00 da start oladi. Eslatib o‘tamiz, Gvardiola jamoasi avvalroq finalda «Arsenal»ni mag‘lub etib, Liga Kubogini qo‘lga kiritgan edi.
