Manuel Noyer «Bavariya» bilan shartnomani uzaytirish sabablarini tushuntirdi. Bugun darvozabon Myunxen klubi bilan 2026/27 yilgi mavsum yakuniga qadar mo‘ljallangan yangi bitimga imzo chekdi.
– Manuel, endi hammasi rasmiylashdi: siz «Bavariya» bilan shartnomangizni yana bir yilga uzaytirdingiz. Bundan qanchalik mamnunsiz?
– Men juda ham xursandman! Bir qarorga kelishim uchun biroz vaqt kerak bo‘ldi — shunchaki shoshilishni istamadim. Bu, birinchi navbatda, men uchun, lekin albatta klub va jamoa uchun ham juda muhim qaror edi. Hozir ushbu qarorim to‘g‘ri bo‘lganiga to‘liq ishonchim komil.
– Agar xulosa qiladigan bo‘lsak — nima uchun Manuel Noyer «Bavariya» bilan shartnomasini yana bir yilga uzaytirdi?
– Chunki men uchun bu yerda hamma narsa ideal darajada: bizda ajoyib murabbiylar shtabi va fantastik tarkib bor. Men o‘z qiymatimni yana bir bor isbotlay oldim. Biz hatto eng yuqori darajada ham istalgan raqibni mag‘lub eta olamiz, — dedi Noyer.
Germaniya Bundesligasining joriy mavsumida 40 yoshli darvozabon 21 ta o‘yinda maydonga tushib, ularning 7 tasida o‘z darvozasi daxlsizligini saqlab qoldi.
