Londonning «Arsenal» klubi yarim himoyachisi Martin Subimendi «PSJ»ga qarshi bo‘lib o‘tadigan YECHL final uchrashuvi haqida o‘z fikrlarini bildirdi. Ushbu to‘qnashuv 30 may kuni Budapeshtda bo‘lib o‘tadi. «To‘pchilar» o‘z tarixlarida ilk bor eng nufuzli Yevrokubokda g‘olib chiqishlari mumkin.
«Biz bu o‘yinni intiqlik bilan kutyapmiz. Ortda uzun mavsum qoldi va biz muvaffaqiyatga qanchalik yaqin turganimizni ko‘rib turibmiz. Barchasini haqiqatan ham buyuk natija bilan yakunlashni juda istardik. Agar buni uddalay olsak, muxlislarimizga unutilmas xotiralarni taqdim etamiz. Umid qilamanki, bu takrorlanmas kun bo‘ladi», — deya Subimendining so‘zlarini keltiradi Daily Mail nashri.
Eslatib o‘tamiz, yarim finalda Mikel Arteta shogirdlari Madridning «Atletiko» klubini umumiy 2:1 hisobida mag‘lub etishgan edi.
