Italiya chempionati yakunishiga ikki tur qolganida ham hali hamon Chempionlar ligasi hududidan (kuchli to‘rtlikdan) joy olishga da’vogarlik qilayotgan «Komo» tarkibida jiddiy yo‘qotish qayd etildi.
Ispaniyalik mutaxassis Sesk Fabregas boshqarayotgan klub o‘z tarkibidagi asosiy yulduzlardan biri — hujumchi Niko Pasni yo‘qotdi. Fabregasning aniqlik kiritishicha, futbolchining tizzasida muammolar yuzaga kelgan. Bu holat «Komo»ning turnirdagi o‘z vazifalarini hal qilib bo‘lgan «Parma»ga qarshi kechadigan bahsdagi imkoniyatlarini sezilarli darajada pasaytirishi aniq.
Eslatib o‘tamiz, Pas joriy mavsumda Italiya chempionatida 12 ta gol urishga ulgurgan edi — bu klubda Anastasios Duvikasdan keyingi ikkinchi eng yaxshi ko‘rsatkichdir. Ayni paytda Italiya shimoli vakili bo‘lgan ushbu klub A Seriya turnir jadvalida oltinchi o‘rinni egallab turibdi.
