Germaniya terma jamoasi bosh murabbiyi Yulian Nagelsmann Manuel Noyerning qaytishi haqida tarqalgan ma’lumotlarga munosabat bildirdi. Turli manbalarning xabariga ko‘ra, «Bavariya»ning 40 yoshli darvozaboni milliy jamoaga qaytadi va u bilan birga Jahon chempionatiga yo‘l oladi. Bundestim ustozi esa yulduzli faxriy futbolchi borasidagi savolga to‘g‘ridan-to‘g‘ri javob berishni istamadi.

— Bu haqda so‘rashayotgani meni hayron qoldirmaydi, lekin men avvalo futbolchilarning o‘zi bilan shaxsan gaplashib olmoqchiman, hozircha buni amalga oshirganim yo‘q, — dedi Nagelsmann Sportstudio nashriga bergan intervyusida.

— Noyer 55 nafar futbolchidan iborat kengaytirilgan tarkib ro‘yxatiga kirdimi? — Buni izohlamayman. Men hatto ushbu ro‘yxatning o‘zini ko‘rganim ham yo‘q — qaydnomani mening menejerim jo‘natgan, — deya kulgancha javob qaytardi mutaxassis.

Eslatib o‘tamiz, Manuel Noyer Germaniya terma jamoasidagi faoliyatini 2024 yilda yakunlagan edi.