Германия терма жамоаси бош мураббийи Юлиан Нагельсманн Мануэль Нойернинг қайтиши ҳақида тарқалган маълумотларга муносабат билдирди. Турли манбаларнинг хабарига кўра, «Бавария»нинг 40 ёшли дарвозабони миллий жамоага қайтади ва у билан бирга Жаҳон чемпионатига йўл олади. Бундестим устози эса юлдузли фахрий футболчи борасидаги саволга тўғридан-тўғри жавоб беришни истамади.
— Бу ҳақда сўрашаётгани мени ҳайрон қолдирмайди, лекин мен аввало футболчиларнинг ўзи билан шахсан гаплашиб олмоқчиман, ҳозирча буни амалга оширганим йўқ, — деди Нагельсманн Sportstudio нашрига берган интервьюсида.
— Нойер 55 нафар футболчидан иборат кенгайтирилган таркиб рўйхатига кирдими? — Буни изоҳламайман. Мен ҳатто ушбу рўйхатнинг ўзини кўрганим ҳам йўқ — қайдномани менинг менежерим жўнатган, — дея кулганча жавоб қайтарди мутахассис.
Эслатиб ўтамиз, Мануэль Нойер Германия терма жамоасидаги фаолиятини 2024 йилда якунлаган эди.
