«Barselona» prezidenti Joan Laporta Robert Levandovskiga jamoa tarkibidagi o‘yinlari uchun minnatdorchilik bildirdi.

Kecha 37 yoshli hujumchi mavsum yakunlanganidan keyin «ko‘k-anorranglilar»ni tark etishini e’lon qildi.

«O‘zining sportdagi iste’dodidan tashqari, «Barselona» va mamlakat tarixida o‘chirib bo‘lmas insoniy iz qoldirayotgan shaxs — Robert Levandovskiga o‘z minnatdorchiligimni bildiraman.

U klub uchun qiyin bo‘lgan paytda yetib kelgandi va bu transfer uning aynan «Barsa»da o‘ynash istagidagi qat’iyati tufayli amalga oshgandi. Uning faoliyati va obro‘si jamoaning o‘ziga bo‘lgan ishonchini oshirishda hal qiluvchi rol o‘ynadi. Jamoa so‘nggi to‘rt yil ichida uch bor chempionlikni qo‘lga kiritdi va bunda Robertning professionalligi, fidoyiligi hamda gollarining hissasi katta bo‘ldi.

«Barsa» va Kataloniya doimo sening uying bo‘lib qoladi! Hammasi uchun rahmat va tez orada ko‘rishguncha!» — deb yozdi Laporta.