Madridning «Real» klubi bosh murabbiyi Alvaro Arbeloa Kilian Mbappening «Sevilya»ga qarshi o‘yindagi (1:0) harakatlariga baho berdi. Fransiyalik hujumchi jarohatidan so‘ng asosiy tarkibga qaytdi, biroq samarali harakatlar bilan ajralib tura olmadi. Yakshanba kuni bo‘lib o‘tgan La Liga bahsida «qaymoqranglilar»ga minimal hisobdagi g‘alabani Vinisius Juniorning goli taqdim etdi.

«Mbappe ajoyib hajmdagi ishni bajardi. Afsuski, bu safar u gol ura olmadi — omadi kelmadi. Umid qilamanki, keyingi haftada unga omad kulib boqadi», — deya Arbeloaning so‘zlarini keltirmoqda Madrid Xtra.

27 yoshli forvard 24 ta gol bilan Ispaniya chempionati to‘purarlar poygasida peshqadamlik qilmoqda. 23 may kuni «Real» o‘z maydonida so‘nggi tur doirasida Bilbaoning «Atletik» klubini qabul qiladi.