Мадриднинг «Реал» клуби бош мураббийи Альваро Арбелоа Килиан Мбаппенинг «Севилья»га қарши ўйиндаги (1:0) ҳаракатларига баҳо берди. Франциялик ҳужумчи жароҳатидан сўнг асосий таркибга қайтди, бироқ самарали ҳаракатлар билан ажралиб тура олмади. Якшанба куни бўлиб ўтган Ла Лига баҳсида «қаймоқранглилар»га минимал ҳисобдаги ғалабани Винисиус Жуниорнинг голи тақдим этди.
«Мбаппе ажойиб ҳажмдаги ишни бажарди. Афсуски, бу сафар у гол ура олмади — омади келмади. Умид қиламанки, кейинги ҳафтада унга омад кулиб боқади», — дея Арбелоанинг сўзларини келтирмоқда Madrid Xtra.
27 ёшли форвард 24 та гол билан Испания чемпионати тўпурарлар пойгасида пешқадамлик қилмоқда. 23 май куни «Реал» ўз майдонида сўнгги тур доирасида Бильбаонинг «Атлетик» клубини қабул қилади.













