Madridning «Atletiko» klubi hujumchisi Antuan Grizmann jamoa muxlislari bilan xayrlashdi. Yakshanba kuni fransiyalik futbolchining «matraschilar» safida o‘z maydonidagi xayrlashuv uchrashuvi bo‘lib o‘tdi va unda u golli uzatmani amalga oshirib, jamoasining «Jirona» ustidan qozonilgan g‘alabasiga (1:0) hissa qo‘shdi.

«Men «Atletiko»ga La Liga va Chempionlar ligasida g‘alaba taqdim eta olmadim, ammo bugun oqshom sodir bo‘lgan voqea men uchun sovrinlardan ham muhimroq ahamiyatga ega. Sizlarning menga bo‘lgan muhabbatingizni bir umr yodimda saqlayman», — deya 35 yoshli futbolchining muxlislarga yo‘llagan murojaatidan iqtibos keltirmoqda Atletico Universe nashri.

Antuan Grizmann mavsum yakunlanganidan so‘ng «Orlando Siti» futbolchisiga aylanadi. Forvardning MLS klubiga o‘tishi shu yilning mart oyi oxiridayoq rasman tasdiqlangan edi.