«Barselona» vingeri Lamin Yamal Robert Levandovskining «Kamp Nou» muxlislari bilan xayrlashuviga munosabat bildirdi. Hujumchi «ko‘k-anorranglilar» safida o‘z maydonidagi so‘nggi uchrashuvini o‘tkazdi — uning shartnomasi mavsum yakunida o‘z nihoyasiga yetadi. «Betis»ga qarshi kechgan va 3:1 hisobidagi g‘alaba bilan tugagan bahsning yakuniy hushtagidan so‘ng, polyak futbolchisi mahalliy muxlislarga murojaat yo‘lladi.

Yamal jamoadoshining ishqibozlar bilan vidolashuviga ijtimoiy tarmoqlar orqali bitta so‘z bilan izoh qoldirdi: «Afsona».

18 yoshli ispaniyalik futbolchining o‘zi esa ushbu uchrashuvda ishtirok etmadi — u aprel oyida olgan jarohatidan so‘ng tiklanish jarayonini davom ettirmoqda.

Robert Levandovski 2022 yilning yozidan buyon «Barselona» sharafini himoya qilib kelayotgan edi.